Toen Marianne, ruum 11 jaor geleeje, woord aangesteld as dirigente beej de Meulezengers waas zeej al gauw in gezelschap van Math. Same kwaame ze naor ut toenmalige ' Meulehonk in Velden'. De iërsten tiëd zoot Math aan de taofel (achter ut koër) en had daorbeej alle partituren van te zinge meziekstökke veur zich. Ieferig vollegde hae of alles good gezonge woord en of d'r wat fout ging, det woord dan met zien dochter bespraoke.
Al gauw woord hae beej ut koër onmisbaar: hae zoot eedere repetitie de koffie dae in de pauze woord gedronke. En daorbeej waas altiëd ein pletske, de speklaas moch neet ontbraeke!
Aaf en toë woord daorbeej wat vüül herrie gemak, waorop Marianne dan ' verwietend' reep 'pappa'!
De meziekpartituure woorte ingeruild veur de presentieliës, die door um trouw woord beejgehalde. Door ut groëte aantal nieje leeje nao 'corona' ein behuurlikke taak veur um, einen haup nieje gezichte. As de liës klaor waas kwaam dan ut puzzelbukske teveurschien.
D'r ging gen gelaegeheid veurbeej of Math bezoch ozze concerte en aktiviteite. Tot aan de zomervakantie, de letste rippetitie met ôs dames, waas hae d'r beej, waobeej we zooge det zien gezondheid achteroët ging.
Ozzen trouwste fan haet ôs vlot verlaote. Ongetwiefeld zal hae zien dochter en ut koër van baove bliėve vollege!
Mevrouw Scherjon, Marianne en Gert-Jan, Marc en Mariëlle, kleinkinder en vaerdere femilie vüül sterkte gewins.
