Mat waas lid van Mannenkoër de Meulezengers vanaaf 1 december 2006, via Jocus- en kaokvrind Funs Bisschops. Mat had al de nuudige zangervaring en zong beej de 1e tenoore zien partie.
Mat waas eine groëte kreatieveling op vüül gebiede: eine ‘woordkunstenaer’, dae geweldige rippetitieverslaage haet geschreeve; en auk ‘little drummerboy’ bekind van onder andere David Bowie, haet veurzeen van ein Venloose teks. Ein nummer det we rond Kersmis nog steeds gaer zinge. Zien Venlose teks op de melodie van Que Sera steit op ôs Vastelaoves rippertoire.
Auk stond Mat mei aan de weeg van meziekfestival ‘Zomerklanke’ van de Meulezengers, opgestart op (zien) Ullingshei beej de Trappiste. Mat ging nao aaflaup altiëd rond met d’n hood, um de Emmausstichting dao auk in ôs sukses te laote deile. Auk haet Mat dao nog ein muzikale beejdrage geleverd met zien operettekwartet.
Op 1 september 2022 besloot Mat neet zingend lid te waere. Door zien ziekte woorte zien meugelikhede beperkter. Einen tiëd geleeje woort Mat bezoch en goof hae aan det zien waereld steeds kleiner woort. Eine creatieve zenger en vrind haet os noow verlaote.
Donderdaag, op ziene 83e verjäördaag zulle weej op gepaste wiëze aafscheid neeme van Mat.