« Terug naar overzicht

In memoriam: John Schreurs

07-11-1951 – 13-09-2020

Vanaaf fibberwari 2008 hebbe weej meuge geneete van de stum en de vrindschap van John.

Hae waas eine Meulezenger in hert en neere. Speuls, eigengereid en unne echte vereinigingsmins. Altied d’r beej as d’r wat te doon waas en gaer bereid te helpe as hae wat veur de vereiniging kôs beteikene. We wiste al lang det d’r beej John iets neet in orde waas, maar tot veur kort waas d’r eigenlijk weinig van te merke.

Tot inkele maonde geleeje de klachte ernstiger woorte. We zooge det John steeds slanker woort. Toen hae twië waeke geleeje nao de rippetissie kwaam wiste we det dit eigenlik ’t aafschied waas. We hebbe veur ‘m gezônge en we meuste daonao toch efkes ein moment neeme um de indrökke te verwerke.

Het niejs det John waas euverleeje kwaam neet als verrassing, maar toch nog onverwach. Vuuls te snel en vuuls te jônk.

Bestuur, dirigent en leeje van de Meulezengers winse Hannie en Jessica vuuël sterkte met dit groeëte verlees.