Vanmorge hoorte weej det ôzze Funs aafgelaupe nach, op 77 jäõrige laeftiėd in ut ziekenhoės is euverleeje.
Naodet hae iėrder had gezônge beej ein gemink koėr kwaam Funs vanaaf mei 2005 met Piet Peters mei naor de Meulezengers. Beej ôs koeër haet hae altied de twiėde tenorpartie gezônge.
Ein trouw lid,hae waas d'r altiėd, zoėwaal beej ut zinge as beej andere aktiviteite. Neet emand dae naodrökkelik aanwezig waas, maar waal emand daeste zoogs geneete. Glinsterende uigskes achter ein lekker glaas beer.
Funs haet door de jaore haer herhaaldelik in ut gashoes gelaege en zoë de nuuëdige taegeslaeg gehad. Det alles waas veur um gen raeje um de rippetitie, oetveuring of stappe met vrinde van Jocus of kaokclub veurbeej te laote gaon. In d'n tiëd van corona kôste normale rippetities neet doorgaon en ginge we as koėr digitaal, zinge achter ut beeldscherm. Auk daobeej waas Funs, met de koptillefoon op, trouw van de partie, zellufs wiės veur viertien daag truuk! Beej det alles woord hae geweldig ondersteund door zien Els, al jaorelangk naeve um, nao ut vuul te vruuge verlaer van zien vrouw Mieke. De letste waeke verbleef hae waer ein paar kier in ut ziekenhoes, toch bleeve we haop halde op herstel.
Noow, tiedes de door um zoė geleefde vastelaovend haet hae de striėd op môtte gaeve.
Bestuur, dirigent en leeje van de Meulezengers winse Els, Dick en Marlon, Roel en Suzanne en alle kleinkinder vuuël sterkte met dit groeëte verlees.