Wie ik in 1980 van de pliessieschoël aafkwaam waas ut binne de Venloose pliessie normaal det diene mentor dich meinoom naor de repetitie op maondaagaovend beej Copacabana aan de Leutherwaeg. Zoëdoonde woord ik op  20 jäörige laeftiëd al lid van ein koër. Met det pliessiekoër, waat eine gemiddelde laeftiëd had dae veur koëre hiël erg liëg waas, heb ik met einen haup andere met vüül plezeer gezonge.

Det veranderde wie auk de pliessie ging verandere, de probleme van elleken daag, woorte ut gesprek van de repetities en det beteikende nimmer det stökse ontspanning.

De gelaegenheid van de zillevere broelof van Lei en Kitty Martens woordt door ein aantal ald leeje, waoronder ik zelluf, aangegreepe um nog ens van os te laote huure. Onder de leiding van Wim van Gardingen, dae auk beej ut pliessiekoër waas gestop, woord in de schoel 'De Meule' inkele waeke hard gerepeteerd, waornao de opluustering van de mis  in ut kapelke van Genuuje. Behalleve ut broëdspaar ware auk de andere aanwezige, waoronder auk Ben Verdellen (letterlik) stil van os optraeje.

Al met al waas de kwaliteit van de zang en de gezelligheid van de repetities ein gooje raeje um vanaaf det optraeje dökker beejein te komme. Gaondeweg zoë dök det we eeder waek meuste aantraeje...de Meulezengers ware gebaore.

In verband met ut plekke van de vloer door ut beer, woord ein andere ruumte gezoch en gevonde aan de Greunstraot.

De toetraejing van einen haup leeje oët ander geleedinge haet gemak det d'r noow inmiddels ein vrindeklup steit, waorbeej iderein zien beejdrage levert.

Ondertösse onder leiding van Pieter Bongaerts is d'r ein leuk, gezellig koër ontstaon, det behalleve aan ein good koërnivoo auk de gezelligheid hoëg in ut vaandel haet staon.  Zoëwaal de meziekoetveuringe as andere activiteite slaon beej eederein good aan.

Zoëdoonde vind ik ut elleke waek opniej gezellig um op donderdaagaovend naor de repetitie in os honk te gaon en beej andere akitiviteite van ut koër present te zien.